An An Taklob kan Turin (Ingles, Shroud of Turin) sarong telang linen na igwang tala' kan imahe nin sarong tawo na garo nag'agi nin sarong makuring pagsakit pisikal na baga nag'ooyon asin nag'aayog sa manera nin krusipiksyon.
Ining telang ini nasasaray ngonyan sa kapilya real kan Katedral ni San Juan de Bautista sa Turin, Italya. An kapôngalan kaini asin kan imahe kaini iyo an labilabing pigdedebatehan sa pag'oltan kan mga syantipiko, mga teologo, mga historyador asin kan mga parasaligsig.
An mga paratubod nakikipagngutiil na an pangkoromon na ini iyo nanggad idtong ginamit na pamatos sa hawak ni Hesukristo kan aldaw na siya ilinubong, asin ta an imahe na pandok na natatala' iyo an Banal na Lalawgon ni Hesus. An mga paratuyaw man nangungutiil na an artifak na ini nagbutwa sana pakalihis nin sarong millennium pakatapos mangyari an Krusipiksyon. An magkasing ibong binabatay man an saindang mga argumento sa syensia asin sa mga historikal na dokumento sa pagtolod kan saindang mga panindogan.
An imahe sa taklob mas malinaw sa itom-puti na negatibong pelikula kisa sa natural na kolor niyang sepia. An makangalas na imaheng negatibong ini enot namasdan kan bangging idto nin Mayo 28, 1898, sa baliktad kan potograpong plaka kan amateur na pararetrato na si Secondo Pia, kan siya tinugotan na pitikon an nasabing taklob kan ini naka-eksibit sa Katedral kan Turin. An Simbahan Katoliko dai formalmente ini-endorso o sinisikwal man an Taklob, alagad kan 1958 si Santo Papa Pius XII pinag'oyonan asin binisto an imahe komo katakin na debosyon sa debosyon nin mga Katoliko sa Banal na Lalawgon ni Hesus.